AQSHning 10 ta hududida ommaviy otishmalar sodir bo‘ldi

 

Qurollar qo‘llanilgan zo‘ravonliklar arxiviga ko‘ra, juma va yakshanba kunlari orasida AQSHda kamida 10 ta ommaviy otishma sodir bo‘lgan. 24 iyun kuni Virjiniya shtatining Xoupell shahrida sodir bo‘lgan otishmada ikki o‘smir halok bo‘ldi, yana ikki nafari yaralandi. Hozirda tergov harakatlari olib borilmoqda, hibsga olinganlar yo‘q. 

 

25 iyun kuni Nyu-Yorkning Bruklin shahridagi Bedford-Styuyzant tumanida to‘rt kishi, jumladan bir bola otib o‘ldirilgan. Voqea uy yaqinida kabob pishirayotganda sodir bo‘lgan. Skuterda qurollangan ikki kishi kelib, odamlarga qarata o‘q uzgan. Politsiya gumonlanuvchilarni qidirmoqda.

 

25 iyun kuni Texasning Xyuston shahrida to‘rt nafar voyaga yetmagan bola jarohatlangan, ulardan ikki nafari vafot etgan. Hodisaga jami 10 ga yaqin kishidan iborat ikki guruh yoshlar o‘rtasidagi mojaro sabab bo‘lgan. Hech kim hibsga olinmagan.

 

Shu kuni Minnesota shtatining Minneapolis shahri markazidagi Stoun-Arch ko‘prigi yaqinida yuz bergan ommaviy mushtlashuv chog‘ida to‘rt kishi, jumladan, uch o‘smir otib o‘ldirilgan edi. Guvohlarning aytishicha, gumonlanuvchi mashinada voqea joyidan qochib ketgan. Hibsga olinganlar haqida xabar berilmagan.

 

26 iyun kuni Texasning San-Antonio shahridagi Manxetten tungi klubida sodir bo‘lgan otishmada bir kishi halok bo‘ldi, yana uch kishi yaralandi. Politsiya maʼlumotlariga ko‘ra, tartibsizlik tungi klubda boshlangan. Shahar politsiyasi otishmani tergov qilmoqda. Jorjiya shtatining Bleykli shahrida 26 iyun kuni gavjum tungi klub va restoranda sodir bo‘lgan otishmada bir kishi halok bo‘ldi, olti kishi yaralandi. Otishma sabablari aniqlanmoqda, hibsga olinganlar yo‘q.

 

Shu kuni Nyu-Jersi shtatidagi Paterson ko‘chasida sodir bo‘lgan otishmada besh kishi, jumladan, uch o‘smir yaralandi. Jinoyat sabablari aniqlanmoqda. Hibsga olinganlar yo‘q. Shuningdek, Vashingtonning Takoma shahrida sakkiz kishi jarohat oldi. Politsiya maʼlumotlariga ko‘ra, o‘q ovozi bino orqasidagi xiyobonda janjal paytida eshitilgan. Barcha jabrlanganlar hayot uchun xavfli bo‘lmagan jarohatlar bilan kasalxonaga yotqizilgan. Hech kim hibsga olinmagan.

 

Bundan tashqari, Texasning Uinona shahrida bir guruh odamlar o‘rtasida sodir bo‘lgan otishmada besh kishi yaralangan, ulardan biri og‘ir ahvolda. Tekshiruv natijasida aniqlanishicha, otishma konsert sahnasi yaqinidagi mushtlashuvdan boshlangan. Birinchi o‘qdan keyin baʼzi guruhlar yugurib borib, kiraverishdagi qo‘riqchilarga topshirgan qurollarini olib ketishdi. Keyin ikkinchi otishma sodir bo‘ldi.

 

26 iyunda Virjiniya shtati Saterlin shahrida 100 dan ortiq odam ishtirok etgan ziyofatda yuz bergan otishmada bir kishi halok bo‘ldi, yetti kishi yaralandi. Hozircha otishma sabablari aniqlanmoqda. Hibsga olinganlar yo‘q.