Qashqadaryoda issiq sabab avtomashina yonib ketgani aytildi
FVB xabariga ko‘ra, avtomobil harakatlanayotgan vaqtida to‘satdan yong‘in chiqqan.
Ijtimoiy tarqmoqda Qarshi–Samarqand yo‘lida issiq tufayli avtomashina yonib ketgani haqida xabarlar tarqaldi. Holat yuzasidan viloyat Favqulodda vaziyatlar boshqarmasi matbuot xizmati ma’lumot berdi.
Qayd etilishicha, hodisa bugun, 29-iyun kuni Qashqadaryo viloyatining Ko‘kdala tumani Beglamish mahallasi hududidan o‘tuvchi 4P87 avtomobil yo‘lida sodir bo‘lgan. Bu haqda fuqarolar tomonidan tuman Favqulodda vaziyatlar bo‘limiga soat 14:38 larda xabar berilgan.
Xabarga ko‘ra, qutqaruv xizmatidan 1 ta bo‘linma voqea joyiga yetib borib, yong‘inni soat taxminan 15.05 larda to‘liq bartaraf etgan.
“Avtomobil harakatlanayotgan bo‘lgan va to‘satdan yong‘in chiqqan, avtomobilda birlamchi yong‘in o‘chirish vositasi (ognetushitel) bo‘lmaganligi uchun yong‘inni dastlab holatidayoq o‘chirolmagan”, — deyiladi xabarda.
Hodisa oqibatida hech kim tan jarohati olmagan. Avtomashining to‘liq qismi yonib zararlangan. Hozirda moddiy zarar miqdori aniqlanmoqda.
