Shanxay normal hayotga qaytmoqda
3 oylik tanaffusdan so‘ng shaharda Disneylend ochildi
Shanxaydagi Disneylend uch oylik tanaffusdan so‘ng 30-iyun kuni qayta ochildi. Bu haqda “Sinxua” agentligi xabar bermoqda.
Eslatib o‘tamiz, ushbu park koronavirus sababli yopilgan edi. Shahardagi epidemiologik vaziyat yaxshilangani sababli uning ishiga yana ruxsat berilgan. Kirish joyida tashrif buyuruvchilar 72 soatdan kechiktirmay salbiy test natijasini taqdim etishlari, niqob taqishlari va haroratni o‘lchashlari kerak.
Shuningdek, Shanxayda umumiy ovqatlanish korxonalarida xizmat ko‘rsatish asta-sekin tiklanmoqda.
Epidemiologik xavf zonalari mavjud bo‘lmagan va o‘tgan hafta davomida birorta ham COVID-19 infeksiyasi qayd etilmagan hududlarda joylashgan restoranlar shahar hokimiyati ko‘rsatmalariga asosan mijozlarga bevosita muassasalarda xizmat ko‘rsatishni boshlashlari mumkin. Biroq bu umumiy ovqatlanish shoxobchalarining sig‘imi maksimalning 50-70 foizini tashkil qiladi. Tashrif buyuruvchilar restoranga kirishda “yashil” salomatlik QR kodini va salbiy test natijasini ko‘rsatishi talab qilinadi.
