Shijoatli o‘g‘il-qizlarim bor ekan, biz har qanday qiyinchiliklarni albatta yengib o‘tamiz—Prezident
Shavkat Mirziyoyev Yoshlar kuniga bag‘ishlangan bayram tadbirida nutq so‘zlamoqda.
Prezident Shavkat Mirziyoyev Yoshlar kuni munosabati bilan tashkil etilgan tadbirlarda ishtirok etish uchun “Yangi O‘zbekiston” bog‘iga keldi. Bu haqda Prezident Matbuot xizmati xabar berdi.
Davlat rahbari bog‘da Besh tashabbus yo‘nalishlari bo‘yicha tashkil etilgan pavilonlar faoliyati bilan tanishib, yoshlar bilan muloqot qildi. Shundan so‘ng Yoshlar kuniga bag‘ishlangan bayram tadbirida nutq so‘zladi.
“Albatta, sizlar bilan uchrashish, ko‘nglingizdagi ezgu orzu va rejalaringiz bilan o‘rtoqlashish, taklif va tashabbuslaringiz haqida eshitish menga doimo quvonch va g‘urur bag‘ishlaydi.
Sizlarning shijoat va intilishingizni ko‘rib, yonib turgan ko‘zlaringizga boqib, o‘zimga bitmas-tuganmas kuch olaman.
Hozirgina Prezident va ijod maktablari o‘quvchilari, Yangi O‘zbekiston universiteti talabalari, yosh olim va ijodkorlar, dasturchilar, sportchilar va tadbirkorlar bilan gaplashib, bir narsaga qat’iy amin bo‘ldim.
Bugungi yoshlarimizning salohiyati, dunyoqarashi, bildirgan taklif va tashabbuslari, mustaqil fikrlashi, kelajak va Vatan haqida, o‘zining jamiyatdagi o‘rni va mas’uliyati haqidagi qarashlari barcha ota-onalar, ustoz-murabbiylar qatorida meni ham cheksiz quvontiradi”, — dedi Prezident o‘z nutqida.
