Talabalar uchun davlat granti soni ikki baravarga oshiriladi— Prezident
Shuningdek, texnikumlar uchun ta’lim krediti joriy qilinadi.
Avvalroq O‘zbekiston Prezidenti Shavkat Mirziyoyev Yoshlar kuniga bag‘ishlangan bayram tadbirida ishtirok etib, nutq so‘zlagani xabar qilingandi.
Davlat rahbari nutqi davomida O‘zbekistonda yoshlar uchun amaldagi imtiyozlarni 11 tadan 25 taga ko‘paytirilishini ta’kidlagandi. Shuningdek, Prezident so‘zida davom etib, ta’lim sohasiga ham to‘xtalib o‘tdi.
“Yana bir muhim yangilik – musiqa san’atiga qiziqishi baland bo‘lgan yoshlarni yanada qo‘llab-quvvatlash maqsadida 2022-2023 o‘quv yilidan boshlab:
—maqom xonandaligi, maqom cholg‘u ijrochiligi va baxshichilik yo‘nalishlariga yangi qabul qilingan talabalarning shartnoma to‘lovlari to‘liq davlat tomonidan to‘lab beriladi;
—fortepiano ijrochilari tayyorlash bo‘yicha qabulni 3 barobarga ko‘paytirib, bu yo‘nalishda ham kontrakt to‘lovlari to‘la qoplab beriladi.
Bundan tashqari, endi texnikumlarga qabul yilda 2 marta tashkil etilib, talabalar uchun davlat granti soni 2 barobarga oshiriladi.
Shuningdek, texnikumlar uchun ta’lim krediti joriy qilinadi va 80 mingdan ziyod yoshlarga kredit berish uchun moliyaviy resurs ajratiladi.
Bundan buyon xususiy ta’lim muassasalarida IT bo‘yicha o‘qish (dasturlash, veb-dizayner, animatsiya) istagini bildirgan yoshlarga ham 20 million so‘mgacha miqdorda 4 yillik imtiyozli kredit taqdim etiladi”, — dedi Prezident.
