“Yoshlar daftari”dagi imtiyozlar 11 tadan 25 taga ko‘paytiriladi—Prezident
Shuningdek, yoshlarga ilm-fan, sport, san’at va madaniyat yo‘nalishlaridagi to‘garaklar uchun 6 oy davomida 300 ming so‘mdan pul to‘lanadi.
Ayni paytda Toshkentdagi “Yangi O‘zbekiston” bog‘ida Yoshlar kuniga bag‘ishlangan bayram tadbiri bo‘lib o‘tmoqda. Unda Prezident Shavkat Mirziyoyev nutq so‘zlab, barchani bayram bilan tabrikladi va “Yoshlar” daftari bo‘yicha beriladigan imtiyozlarning qo‘paytirilishi haqida gapirib o‘tdi.
“Yoshlarning dunyoqarashi, ularning muayyan bir kasbga bo‘lgan qiziqishi 14 yoshidan, ya’ni maktab davridanoq shakllanadi. Shu bois, bundan buyon 14-17 yosh oralig‘idagi 3 million nafarga yaqin o‘g‘il-qizlarimizga ham “Yoshlar daftari”da ko‘zda tutilgan imtiyoz va yengilliklardan foydalanish imkoniyati yaratiladi.
Xususan, unda nazarda tutilgan imtiyozlar amaldagi 11 tadan 25 taga ko‘paytiriladi.
Ushbu daftarga kiritilgan farzandlarimizga zamonaviy kasblar, axborot texnologiyalari va xorijiy tillarni o‘rganishi uchun har biriga oyiga 1 million 200 ming so‘mdan subsidiya beriladi.
Shuningdek, yoshlarga ilm-fan, sport, san’at va madaniyat yo‘nalishlaridagi to‘garaklar uchun 6 oy davomida 300 ming so‘mdan pul to‘lanadi.
Ularga ushbu yo‘nalishlar bo‘yicha mahalliy olimpiadalarda qatnashish xarajatlari uchun 1 million 200 ming so‘mdan, nufuzli xalqaro olimpiadalar uchun 12 million so‘mdan mablag‘ ajratiladi.
“Temir daftar”, “Ayollar daftari” va “Yoshlar daftari”ga kiritilgan oilalarning farzandlari uchun yilda bir marotaba maktab formasi hamda o‘quv qurollarini sotib olish xarajatini davlat o‘z zimmasiga oladi”, — dedi Prezident.
