Jamoat xavfsizligini buzishga urinayotgan shaxslarga qat’iy choralar ko‘riladi— Shavkat Mirziyoyev
Prezident xalqqa murojaat qilib, ularni turli g‘arazli chaqiriq va harakatlarga berilmaslikka da’vat etdi.
Bugun, 2 iyul kuni Prezident Shavkat Mirziyoyev Nukusga tashrif buyurib, Jo‘qorg‘i Kenges deputatlari, Qoraqalpog‘iston faxriylari va faollari bilan uchrashuv o‘tkazdi.
Unda Davlat raxbari xalqqa murojaat qilib, Konstitusiyaning 70, 71, 72, 74, 75 moddalari o‘zgarishsiz qoldirilishini ma’lum qildi va Nukus shahrida o‘tkazilgan namoyishlar haqida gapirdi.
“Yangi O‘zbekiston, Yangi Qoraqalpog‘istonni albatta birgalikda quramiz! Shu sohadagi barcha islohotlarimiz, muhokamalarimiz, hech shubhasiz, demokratiya va huquqiy mezonlar asosida amalga oshirilishi zarur.
Ayni vaqtda tinchlik va osoyishtalik, jamoat xavfsizligini buzishga urinayotgan har qanday shaxslarga nisbatan qonun doirasida qat’iy choralar ko‘riladi.
O‘zbekistonda “Qonun – ustuvor, jinoyatga jazo muqarrar” degan qoidani amalda ta’minlash uchun barcha kuch va imkoniyatlar yetarli.
Hozirgi vaziyatda barcha yurtdoshlarimizni hamjihatlik va birdamlikka, oqilona ish ko‘rishga, turli g‘arazli chaqiriq va harakatlarga berilmaslikka da’vat etaman.
Men olijanob va bag‘rikeng qoraqalpoq xalqining aql-idroki va donishmandligiga ishonaman", — dedi prezident so‘zining yakunida.
