Muborak tumani hokimi bloger ustidan DXXga shikoyat qildi
Blogerga hokimiyat vakillarini obro‘sizlantirish, mahalliychilik va millatchilik qilish kabi ayblovlar qo‘yilgan.
Qashqadaryo viloyatining Muborak tumani hokimi Akram Aripov o‘zining barcha o‘rinbosarlari bilan birgalikda tumanda faoliyat ko‘rsatayotgan bloger Dilshod Safarov ustidan tuman prokuraturasi, IIB va DXXga ariza yozdi. Bu haqda “Nasafnews” nashri xabar bermoqda.
Arizada blogerga tuman derututlarining sha’ni va qadr-qimmatini qasddan kamsitish, obro‘sizlantirish, shuningdek, mahalliychilik va millatchilik qilish kabi keskin ayblovlar qo‘yilgan.
“Muborak tuman hokimi shaxsan men bilan doim yaxshi muomalada bo‘lib kelayotgan edi. Ammo yaqinda bo‘sh hududlarga deputatlik saylovlarida o‘z nomzodimni berdim. Hokimlikning tashkiliy-nazorat guruhi rahbari Ulug‘bek Shomatov saylovda mening nomzodimni qo‘ymadi. Sababini so‘rasam, hokim ruxsat bermadi dedi. Bu holat bo‘yicha Akram Aripovga 5-6 marotaba iltimos qilib, qo‘ng‘iroq qildim. Ammo hokim meni aldab, saylov o‘tgunicha vaqtni cho‘zdi. Shundan so‘ng, bo‘lgan holatni o‘zimga tegishli kanallarda yoritdim. Men saylovning noqonuniy o‘tgani haqida hech qayerga murojaat qilmadim. Ammo bundan foydalangan hokimlik vakillari meni ustimdan shikoyat yozib qolishgan. Uyat emasmi, xaqlning muammosi bilan ishlamay turib, blogerni ovozini o‘chirish bilan mashg‘ul bo‘lish?”—deydi Dilshod Safarov.
Vaziyat yuzasidan tuman hokimiyati matbuot kotibi Yodgor Tuymurodovning aytishicha, ish sudgacha bormaydi. Bloger ustidan yozilgan ariza qaytarib olinadi va unga nisbatan e’tiroz yo‘qligi bildiriladi.
“Arizaning mazmuni bilan to‘liq tanish emasman. Bu borada rahbariyatga kim taklif berganini ham bilmayman. Ulardan so‘raganimda hokimiyatga nisbatan yozilgan gaplar, ozgina shaxsiyatga o‘tib ketishlar sabab bo‘lganini aytishdi”, — deydi u.
Mazkur xolatga tuman hokimi Akrom Aripov munosabat bildirib, bloger hokim ketsin deb butun xalqni qo‘zg‘atmoqchi bo‘lganini aytgan.
“Deputat bo‘lishim kerak deyapti, deputatlikka men saylamaymanku! Men deputatlikka nomzod ko‘rsatuvchi odam emasman. Haqiqatdan ustidan ariza yozilgan. Butun “rayon”ni, xalqni hokimiyatga qarshi qo‘yyapti u. Latoklarni yeb ketdi, deyapti. Latokni yeb ketgan bo‘lsam asoslab ber, deb aytdim. Faqat hokimni tanqid qilish ishi. Lekin men tanqidni to‘g‘ri qabul qilaman. Ammo bir odatim, nohaqlikka chiday olmayman. Bu butun xalqqa, hokimga baho berib, hokim ketsin deb, butun xalqni qo‘zg‘ab nima qiladi? Unday qilmaslik kerak, men vazir bo‘lgan odamman. Halolligim uchun ishlab yuribman”, — deydi Akram Aripov.
