Shavkat Mirziyoyev Qoraqalpog‘istonga jo‘nab ketgani aytilmoqda

 

Bugun, 2-iyul kuni O‘zbekiston Respublikasi Prezidenti  Shavkat Mirziyoyev Qoraqalpog‘istonga jo‘nab ketdi. Flight Radar servisi prezident samolyotidan tashqari hukumatning yana bir nechta samolyoti Nukusga qarab yo‘lga chiqqanini ko‘rsatmoqda.

 

Eslatib o‘tamiz,  kecha, 1-iyul kuni Nukus shahrida ommaviy miting bo‘lib o‘tgandi. IIV xabariga ko‘ra, bunga respublikada amalga oshirilayotgan konstitusiyaviy islohotlarni noto‘g‘ri talqin qilinishi sabab bo‘lgan va bir guruh fuqarolar kutilmaganda ko‘cha yurishlarini tashkil qilib, Nukusning Markaziy dehqon bozorida to‘planib, namoyishlar uyushtirishgan.

 

2-iyul kuni Qoraqalpog‘iston parlamenti, hukumati va Ichki ishlar vazirligi qo‘shma bayonot chiqarib, Nukus shahrida bir guruh jinoyatchi shaxslar Qoraqalpog‘iston Respublikasining davlat boshqaruvi organlarini egallashga urinishda ifodalangan g‘ayriqonuniy harakatlarni tashkil etgan.

 

Ular populistik shiorlarni niqob qilib olib, fuqarolarning ongi va ishonchini manipulyasiya qilib, tartibsizliklar tashkilotchilari hokimiyat vakillarining qonuniy talablariga bo‘ysunmay, respublika fuqarolarini Qoraqalpog‘iston Respublikasining ma’muriy binolari oldidagi maydonga yig‘gan.

 

Huquqni muhofaza qilish organlari tomonidan qabul qilingan qat’iy choralar bilan tashabbuskorlarning g‘ayriqonuniy hatti-harakatlari to‘xtatilib, ommaviy tartibsizlik uyushtirishga urinishlar tarqalishiga chek qo‘yilgan.