Namanganda oziq-ovqat do‘koni yonib ketdi
Oqibatda binoning 20 kvadrat metr joyi, 10 dona muzlatgich va 2 dona sovutgich yonib zararlangan.
Bugun, 3 iyul kuni Namangan shahrida yo‘l chetidagi oziq-ovqat do‘konida yong‘in yuz berdi. Bu haqda viloyat Favqulodda vaziyatlar boshqarmasi axborot xizmati xabar berdi.
Ma’lum qilinishicha, soat 04:37 da shahar FVB 101 qisqa raqamiga Yakka tartibdagi tadbirkorga qarashli Namangan shaxar “Sharq tongi” MFY Navoiy ko‘chasida joylashgan oziq-ovqat do‘konida yong‘in sodir bo‘layotganligi xaqida xabar kelib tushgan.
O‘t o‘chiruvchilar tomonidan yong‘in bartaraf etilgan. Hodisa oqibatida savdo do‘konining shift qismidan 20 kvadrat metr joyi, 10 dona muzlatgichi, 2 dona sovutgich (kondisioner) hamda savdo do‘koniga tegishli xujjatlar, oziq-ovqat va nooziq-ovqat maxsulotlari yonib zararlangan.
Xozirda sodir bo‘lgan yong‘in yuzasidan tergovga qadar surushtiruv ishlari olib borilmoqda.
