“Qozog‘iston O‘zbekiston Respublikasida sodir bo‘lgan so‘nggi voqealarni xavotir bilan qabul qildi”
Qozog‘iston TIV Qoraqalpog‘istondagi namoyishlar yuzasidan rasmiy bayonot berdi.
Qozog‘iston Respublikasi Tashqi ishlar vazirligi Qoraqalpog‘istonda sodir bo‘lgan so‘nggi voqealar yuzasidan bayonot berdi, deya xabar qilmoqda “Kazinform” nashri.
“O‘zbekiston Qozog‘iston uchun qardosh davlat, ishonchli ittifoqchi va strategik sherik. Shuning uchun Qozog‘iston O‘zbekiston Respublikasida sodir bo‘lgan so‘nggi voqealarni xavotir bilan qabul qildi.
Biz O‘zbekiston rahbariyatining Qoraqalpog‘iston Respublikasidagi vaziyatni barqarorlashtirishga qaratilgan qarorlarini olqishlaymiz va qo‘llab-quvvatlaymiz.
Gʻoyat muhim siyosiy voqea – Konstitusiyaga o‘zgartirish kiritish bo‘yicha referendum arafasida qardosh O‘zbekistonda tinchlik va osoyishtalik qaror topishiga ishonchimiz komil.
Qozog‘iston 1998 yil 31 oktyabrdagi “Abadiy do‘stlik to‘g‘risida”gi shartnoma, 2013 yil 14 iyundagi “Strategik sheriklik to‘g‘risida”gi shartnoma va 2021 yil 6 dekabrdagi “Ittifoqchilik munosabatlari to‘g‘risida”gi deklaratsiya ruhida O‘zbekiston bilan ko‘p tarmoqli hamkorlikni rivojlantirish va mustahkamlash ahdida qat’iy”, - deyiladi rasmiy bayonotda.
