BMT: Qishda ukrainaliklarning ahvoli yanada og‘irlashadi
Hozirda Ukrainaning 15 milliondan ortiq fuqarosi yordamga muhtojligi qayd etilgan.
Qish oylari uylarini tashlab chiqishga majbur bo‘lgan millionlab ukrainaliklarga qo‘shimcha qiyinchiliklarni vujudga keltiradi. Bu haqda BMTning qochqinlar bo‘yicha oliy komissari Filippo Grandi maʼlum qildi.
Grandi shu kunlarda Ukrainada bo‘lib turibdi.
“Ukraina qishlari sovuq va ayovsiz bo‘ladi. Biz katta qiyinchilikka duch kelgan odamlarning sovuqdan aziyat chekmasligi uchun hamma narsa qilishimiz kerak”, – degan u.
BMTning gumanitar masalalar bo‘yicha boshqarmasi maʼlumotlariga ko‘ra, qurolli nizo oqibatida 15.7 million ukrainalikka turli darajada zarar yetkazilgan. Ushbu fuqarolarning barchasi yordamga muhtoj, ammo hozirda ularning 2/3 qismiga ko‘mak berilgan.
Avvalroq BMT Ukrainada halok bo‘lgan tinch aholi sonini ochiqlagandi.
