Neft va gaz sohasidagi taʼlim-ishlab chiqarish klasteri tashkil etildi
Bu bo‘yicha Prezidentning tegishli qarori qabul qilindi.
“Neft va gaz sohasida taʼlim-ishlab chiqarish klasterini tashkil etish chora-tadbirlari to‘g‘risida”gi Prezident qarori (PQ–309-son, 07.07.2022 y.) qabul qilindi.
Qaror bilan Neft va gaz sohasidagi taʼlim-ishlab chiqarish klasteri tashkil etildi.
Neft va gaz sohasida taʼlim, ilm-fan va ishlab chiqarishning o‘zaro integratsiyasini taʼminlash taʼlim klasterining asosiy faoliyat yo‘nalishlaridan hisoblanadi.
Taʼlim klasteri doirasida:
maktab o‘quvchilarini ishlab chiqarish korxonalari uchun ustuvor kasblarga yo‘naltirish maqsadida:
- aniq va tabiiy fanlar bo‘yicha ixtisoslashtirilgan o‘quv rejasi joriy qilinadi;
- ishlab chiqarish tashkilotlari tomonidan maktab o‘quvchilari uchun ekskursiyalar hamda soha faxriylari bilan uchrashuvlar tashkil etiladi;
professional va oliy taʼlim tashkilotlarining o‘quv jarayonini ishlab chiqarish korxonalari faoliyati bilan integratsiya qilish yo‘nalishida:
- fan va mavzular amaliyotga yo‘naltiriladi;
- talabalarda mustaqil taʼlim olish ko‘nikmalari shakllantiriladi;
- xorijiy tillarda o‘qitiladigan mutaxassislik fanlari ulushi oshiriladi.
2022/2023 o‘quv yilidan Taʼlim klasteri tarkibiga kiruvchi:
- professional va oliy taʼlim tashkilotlarida neft va gaz sohasi bo‘yicha tahsil olayotgan iqtidorli o‘quvchilar va talabalar uchun ishlab chiqarish korxonalarining stipendiyalari joriy etiladi;
- ishlab chiqarish korxonalarining kamida 5 yil ish stajiga ega xodimlarini “O‘zbekneftgaz” AJning tavsiyanomasi asosida ishlab chiqarishdan ajralmagan holda, keyinchalik o‘zi ishlab turgan korxonada kamida 3 yil ishlab berish sharti bilan OTMning bakalavriat taʼlim yo‘nalishlari va magistratura mutaxassisliklarida tabaqalashtirilgan to‘lov-kontrakt asosida maqsadli o‘qitish tartibi joriy etiladi.
