Zangiotada fuqaro davlat zaxirasidagi yerni 200 ming AQSH dollariga sotmoqchi bo‘ldi
U kelishilgan pulning 40 ming dollarini olgan vaqtida ashyoviy dalillar bilan qo‘lga tushgan.
Zangiota tumanida sug‘oriladigan yerni 200 000 AQSH dollariga sotmoqchi bo‘lgan firibgar ushlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Ma’lum qilinishicha, Departamentning Chilonzor tuman bo‘limi va Toshkent shahar IIBB xodimlari hamkorligida tezkor tadbir o‘tkazilgan. Unda fuqaro J. U. Zangiota tumani “Ilg‘or” MFY hududidagi 0,5 gektar sug‘oriladigan yer maydonini 200 000 AQSH dollariga sotishini aytib, tegishli hujjatlarni tuman yer kadastr bo‘limida ishlovchi tanishlari orqali hal qilib berishi evaziga oldindan 40 000 AQSH dollarini fuqaro X. dan olgan vaqtida ashyoviy dalillar bilan qo‘lga tushgan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
