Nukusdagi mitingda tinch aholiga o‘q uzilgani aytildi
Mazkur xabarlarga Milliy gvardiya rasmiy izoh berdi.
Ijtimoiy tarmoqlarda Nukusdagi tartibsizliklar vaqtida o‘qotar qurollardan foydalanilgani aytilgan videolavha tarqaldi. Holat yuzasidan Milliy gvardiya raddiya bildirib, tarqalgan xabarlar haqiqatga zid ekanini ma’lum qildi.
Qayd etilishicha, xorijiy davlatlarning birida ayrim ijtimoiy tarmoqlar orqali 1–2 iyul kunlari Nukus shahrida bo‘lib o‘tgan ommaviy tartibsizliklar yuzasidan turli xil yolg‘on ma’lumotlar tarqatilishi davom etmoqda. Xususan, tartibsizliklar sodir bo‘lgan joylarda fuqarolar tomonidan o‘qotar qurollardan otilgan gilzalar topilgani aks etgan videotasvirlar tarqatilgan. Unda “tinch namoyishlar chog‘ida, tinch aholini o‘ldirgan o‘q dorilardan qolgan gilzalar” degan xabar tarqatilgan. Biroq bu videotasvirda hech qanday o‘lganlar ko‘rsatilmagan.
Qo‘shimcha qilinishicha, Nukusdagi miting vaqtida faqat olomonni tarqatish va tartibsizliklarni bostirish uchun maxsus vositalar – yorug‘lik, shovqin va tutun ishlatilgan.
“Aniqlik kiritib o‘tamizki, pirotexnika vositalari bilan to‘ldirilgan patronlarning o‘qlari maxsus 4 o‘qli qo‘shimchali Kalashnikov avtomatdan otiladi. Albatta bunday maxsus vositalarni qo‘llash uchun avtomatga paxtovon o‘qlar joylanadi. Olamonni tarqatish uchun ishlatilgan bu kabi maxsus vositalar qoldiqlarini topib olgan ayrim fuqarolar provokasion ruxdagi videoxabarlarni ijtimoiy tarmoqlarda tarqatishni maqsad qilishgan. Biroq, huquqni muhofaza qiluvchi organlar xodimlarining bunday vaziyatlarda qurollardan foydalanishi uchun qonuniy asoslari mavjud”, — deyiladi xabarda.
