Shavkat Mirziyoyev Yevroosiyo iqtisodiy komissiyasi Hay’ati raisi bilan uchrashdi
Uchrashuvda hamkorlikning qo‘shimcha yo‘nalishlari ro‘yxati imzolangan.
O‘zbekiston Respublikasi Prezidenti Shavkat Mirziyoyev 12-iyul kuni Yevroosiyo iqtisodiy komissiyasi Hay’ati raisi Mixail Myasnikovichni qabul qildi. Bu haqda Prezident matbuot xizmati xabar berdi.
Yevroosiyo iqtisodiy ittifoqi doirasida, eng avvalo, savdo, sanoat kooperatsiyasi, transport va logistika, innovasiyalar, migrasiya va turizm sohalaridagi o‘zaro hamkorlikning ustuvor yo‘nalishlari ko‘rib chiqildi.
Davlat rahbari O‘zbekiston kuzatuvchi davlat sifatida tashkilot tuzilmalari bilan tizimli hamkorlikni yo‘lga qo‘yganini alohida ta’kidladi.
Tegishli memorandum va 2023-yillarga qadar davrga mo‘ljallangan Qo‘shma tadbirlar rejasi amalga oshirilmoqda. Bugun Hamkorlikning qo‘shimcha yo‘nalishlari ro‘yxati imzolandi.
YeOII mamlakatlari bilan o‘zaro savdo va investitsiyalar ko‘rsatkichlari ijobiy sur’at bilan o‘sib borayotgani mamnuniyat bilan qayd etildi.
Savdo to‘siqlarini bartaraf etish, sanoat kooperasiyasini kuchaytirish va ishbilarmonlik aloqalarini rag‘batlantirish, loyihaviy hamkorlikni rivojlantirish, tranzit sohasidagi dastur va loyihalarni ilgari surish, migratsiya tartibotlarini soddalashtirish va o‘zaro sayyohlar oqimini kengaytirish masalalariga alohida e’tibor qaratildi.
Qo‘shma Ishchi guruhning navbatdagi yig‘ilishini o‘tkazishga kelishib olindi.
