Rossiya Kaliningrad masalasida Yevropa bilan kelishuvga erishdi
Unda Moskva daʼvosi qanoatlantirilgan.
Rossiya va Yevroittifoq Kaliningrad viloyatiga tranzit masalasida kelishuvga erishdi. Bu haqda "Izvestiya" xabar berdi.
Unga ko‘ra, Rossiyaning turli qismlari orasida tranzitni cheklab bo‘lmasligi belgilangan. Diplomatik manbalar bu hujjat Moskvani to‘liq qanoatlantirganini taʼkidlagan.
"Izvestiya" suhbatdoshlari bu tartib RFga qarshi sanksiyalarning yettinchi paketida alohida qayd etilishi mumkinligini maʼlum qilgan.
Ayrim maʼlumotlarga ko‘ra, Latviya YEIning bu qarorini qabul qilishni ortga surib kelmoqda. Rossiya Federal Kengashida (parlamentning yuqori palatasi) Vilnyusning bu xatti-harakatlari "juda xavfli boshi berk ko‘chaga" kirib qolishga sabab bo‘lganini aytishgan.
Maʼlumot o‘rnida: 18 iyun kuni Litva o‘z hududi orqali Rossiyaning eksklavi Kaliningrad viloyatiga temiryo‘l orqali tranzitni taqiqlab qo‘ydi. Bu orqali Moskva yetkazib berayotgan tovarlar 30 foizga qisqardi.
Avvalroq Germaniya Kaliningrad masalasida Moskvaning tarafini olib chiqqandi.
