Farg‘onadagi neft mahsulotlari sexida yong‘in chiqdi
Hodisa oqibatida 2 kishi kuyish tan jarohati olgan
Bugun, 14-iyul kuni Farg‘ona viloyatining Toshloq tumanida joylashgan neftni qayta ishlash sexida yong‘in sodir bo‘ldi. Bu haqda viloyat Favqulodda vaziyatlar boshqarmasi Matbuot xizmati xabar bermoqda.
Hodisa soat 16:26 da Toshloq tumani “Axshak” MFY Besholish dahasida joylashgan neft mahsulotlarini qayta ishlash uchun mo‘ljallangan sexda yuz bergan. Unda maxsus qazilgan 4x4 o‘lchamli chuqurlikdagi sig‘imi 200 litr bo‘lgan 5 dona temir idishlarda neft mahsulotlaridan yong‘in kelib chiqqan.
Mazkur sex Marg‘ilon shahar Al-Farobiy ko‘chasida yashovchi 1980-yilda tug‘ilgan A. I. ga tegishli bo‘lgan. Yong‘in oqibatida Toshloq tumani Hamza ko‘chasida yashovchi 1995-yilda tug‘ilgan fuqaro J. T. I-II-III darajali 30 foiz kuyish, Marg‘ilon shahar “Nadirmat” MFY Amindaryo ko‘chasida yashovchi 1987-yilda tug‘ilgan fuqaro F. E. I-II-III darajali 80 foiz kuyish tan jaroxatlari bilan viloyat RSHYOIMga yotqizilgan.
Hozirda yong‘inning kelib chiqish sababi va zarari aniqlanmoqda.
