Toshkentda 49 yoshli erkak o‘zini yuqoridan tashlab, joniga qasd qilmoqchi bo‘ldi
Keyinchalik u bir kun avval do‘stlari bilan spirtli ichimlik iste’mol qilganini aytgan.
10-iyul kuni Toshkent shahrining Bektemir tumanida noma’lum erkak o‘zini yuqoridan tashlab, joniga qasd qilmoqchi bo‘ldi. Bu haqda viloyati IIBB axborot xizmati xabar qildi.
Qayd etilishicha, erkak Bektemir tumani “Qo‘yliq” bozori hududida joylashgan yuqori kuchlanishli elektr uzatish metall konstruksiyasining yuqorisiga chiqib, 32 metr balandlikdan pastga sakrashi bilan tahdid qilgan.
Voqea joyiga birinchi bo‘lib yetib kelgan hududiy profilaktika inspektori katta leytenant Ulug‘bek Abdanbekov vaziyatga tezda baho berib, o‘zini pastga tashlamoqchi bo‘lgan fuqaro bilan muloqotga kirishadi va o‘z hayotini xatarga qo‘yib yuqoriga ko‘tariladi. Mavjud xavf-xatarga qaramay, inspektor elektr uzatish liniyasining ustuniga chiqishni davom ettiradi va fuqaroning pastga tushishiga yordam berib, uning hayotini saqlab qoladi.
Surishtiruv davomida 49 yoshli Gʻ. M. bir kun avval do‘stlari bilan spirtli ichimliklar iste’mol qilib, bozorga qanday va nima uchun kelganini hamda elektr ustunga nima sababdan chiqib olganini eslay olmasligini ma’lum qilgan.
