Afg‘onistondan Termizga snaryad uchirganlar qo‘lga olindi
Jinoiy guruhning 3 nafar a’zosi o‘ldirilgan.
Surxondaryo viloyatining Termiz shahriga Afg‘oniston tomondan snaryad uchirganlar qo‘lga olindi. Afg‘oniston hukumati rasmiysi Zabihulloh Mujohidning ma’lum qilishicha, Qunduz viloyatining Imom Sohib tumanidagi maxsus operatsiya davomida “Xavorijlar” markazi topilib, yo‘q qilingan.
Operatsiyada 3 nafar xavorij o‘ldirilgan, besh nafari tiriklayin qo‘lga olingan. Ularning avtomashinalari va qurollari musodara qilingan. Qo‘shimcha qilinishicha, guruh a’zolari Tojikiston hududiga ham snaryadlar uchirgan.
Eslatib o‘tamiz, joriy yilning 5 iyul kuni Termiz shahridagi Majnuntol mahallasiga Afg‘oniston tomondan 5 ta raketa kelib tushgandi. O‘zbekiston Tashqi ishlar vazirligi snaryadlar hujumi paytida portlashlar sodir bo‘lmagani va oqibatda hech kim halok bo‘lmaganini bildirgan.
