Ayrim avtomobillarga metan gaz narxi oshirildimi?
Monopoliyaga qarshi kurashish qo‘mitasi ijtimoiy tarmoqda tarqalgan xabarlarga munosabat bildirdi.
Ijtimoiy tarmoqda ayrim turdagi avtomobillarga gaz quyish shaxobchalari tomonidan metan gaz narxlari oshilganligi haqida xabarlar tarqaldi. Holat yuzasidan Monopoliyaga qarshi kurashish qo‘mitasi rasmiy munosabat bildirdi.
Ma’lum qilinishicha, Vazirlar Mahkamasining 2022-yil 14-iyuldagi 387-sonli qaroriga muvofiq, yuridik shaxslar uchun tabiiy gaz va elektroenergiya uchun tariflar oshirilishi vaqtinchalik to‘xtatilgan.
Monopoliyaga qarshi kurashish qo‘mitasi tomonidan gaz quyish shaxobchalarida metan gazi narxlari oshirilganligi yuzasidan tezkor o‘rganish ishlari amalga oshirilgan.
O‘rganish natijalariga ko‘ra, Qoraqalpog‘iston Respublikasi, viloyatlar va Toshkent shahrida joylashgan avtomobillarga gaz quyish shaxobchalarida bugungi kunda 1 kub m metan gazining narxi barqaror ravishda o‘rtacha 2300 so‘mdan 2800 so‘mgacha sotilayotganligi aniqlangan.
“Monopoliyaga qarshi kurashish qo‘mitasi tomonidan metan gaz narxlari doimiy monitoring qilib borilayotganligi va avtomobillarga gaz quyish shaxobchalari metan gazi narxlarini sun’iy ravishda oshirgan taqdirda belgilangan tartibda tegishli chora ko‘rilishi ma’lum qilinadi”, — deyiladi xabarda.
Eslatib o‘tamiz, joriy yilning 31-may kuni AI–80 markali benzinning birjadagi narxi 2 foizga ko‘tarilgani xabar qilingandi.
