Qashqadaryoda direktor va o‘qituvchi mushtlashdi
Holat bo’yicha hokimlik va IIB munosabat bildirdi.
Ijtimoiy tarmoqda Qashqadaryo viloyatining Nishon tumanida direktor va o‘qituvchi mushtlashgani aks etgan video tarqaldi. Holat bo‘yicha tuman hokimligi va IIB axborot xizmatlari rasmiy munosabat bildirdi.
Ma’lum qilinishicha, 15-iyul kuni soat 11:00 atrofida Nishon tuman 2-son kasb-hunar maktabida fuqarolar G. U. va X. O. o’zaro tortishib qolib, kelishmovchilik yuzaga kelgan.
Nishon tumani hokimi o‘rinbosari S. Xudoyqulov boshchiligida ishchi guruh tuzilib, voqeaning asl sababi keng jamoatchilik bilan birga o‘rganilgan.
“Direktor va o‘qituvchi ayni vaqtda o‘zaro kelishib olgan holda, bir-biriga nisbatan hech qanday gina-kudratni saqlab qolmagan va kelajakda do‘stona ruhda birgalikda ishlashga qo‘l tashlashgan”, — deyiladi tuman hokimligi xabarida.
Mazkur holat yuzasidan hozirda Nishon tuman IIB JXX HPB profilaktika inspektori tomonidan surishtiruv harakatlari olib borilmoqda.
