Bundan buyon yig‘ilish va qarorlar kamaytiriladi—Prezident
Hokimlarga 10 kun ichida ish uslublarini o‘zgartirishi topshirildi.
Bugun, 18-iyul kuni Prezident Shavkat Mirziyoyev raisligida ekin yerlari va tomorqadan samarali foydalanish orqali oziq-ovqat yetishtirishni va aholi daromadlarini ko‘paytirish masalalari yuzasidan videoselektor yig‘ilishi bo‘lib o‘tmoqda.
Yig‘ilish davomida vazirlar va hokimlar o‘z tizimida o‘n kun muddatda strukturasi va ish uslublarini o‘zgartirishi shartligi ko‘rsatib o‘tildi.
“Bundan buyon yig‘ilish va qarorlarni kamaytirib, ijro va aholi muammolari bo‘yicha ishlaydigan tizim bo‘ladi.
Samarqand viloyatidagi o‘rganishlar ko‘p kamchiliklarimizni ko‘rsatdi. Bir oydan keyin har bir viloyat hokimi qilgan ishlari haqida alohida hisobot beradi.
Oldimizda hali eng qiyin va og‘ir islohotlar turibdi. Hamma o‘zgarishi kerak, ish uslublarini ham o‘zgartirishi kerak”, — dedi Prezident.
Adliya vazirligiga aholi va tadbirkorlarni yangiliklardan xabardor qilish va ularga qulayliklar yaratish hamda qonunchilikni ixchamlashtirish bo‘yicha yangi tizimni ishlab chiqish topshirildi.
Hisob palatasi, Moliya vazirligiga berilayotgan mablag‘lar maqsadli ishlatilishi, ayniqsa, qurilishni moliyalashtirish, subsidiya va kompensasiya ajratish jarayonlarini raqamlashtirish bo‘yicha yangi tizimni ishlab chiqish topshirildi.
“Umuman, hamma mahalla, tumanga tushib, muammolarni ichiga kirib, aniq natijaga ishlashi shart”, — dedi davlat rahbari.
