Toliblar Doha kelishuvining hammasini bajarmadi — Zalmay Xalilzod
U Afg‘oniston kelajagi borasidagi fikrlarini bildirdi.
“Tolibon” Doha kelishuvlarining barcha shartlarini bajarmadi. Bu haqda AQSHning Afg‘oniston bo‘yicha sobiq maxsus vakili Zalmay Xalilzod maʼlum qildi.
“Uning bir qismi amalga oshirildi, bir qismi esa yo‘q. Biz qaytishimiz va toliblarga yakunlanmagan ishni tugatish zarurligini aytishimiz kerak”, — degan diplomat.
Shu bilan birga u Afg‘onistonning tugallanmagan va tarqoq bo‘lib qolishi AQSH manfaatlariga mos kelmasligini taʼkidlagan. Xalilzod Vashingtonning “Tolibon” bilan birga ishlash vazifasi turganini qayd etgan.
Bundan tashqari, sobiq maxsus vakil ayollar huquqini taʼminlash va inklyuziv hukumat masalasida ijobiy fikrda emasligini qo‘shimcha qilgan.
Avvalroq BMT afg‘on xalqi o‘z tarixida eng fojiali davrni boshdan kechirayotganini maʼlum qilgandi.
