Toshkentdagi ko‘p qavatli uyda yong‘in yuz berdi
FVV holat bo‘yicha ma’lumot berdi.
Bugun, 18-iyul kuni Toshkent shahrining Yakkasaroy tumanidagi xonadonda yong‘in sodir bo‘ldi. Bu haqda Favqulodda vaziyatlar vazirligi Matbuot xizmati xabar berdi.
Ma’lum qilinishicha, soat 14:41 da Yakkasaroy tumani “Boshliq” MFY Qushbegi ko‘chasida joylashgan ko‘p kvartirali uylarning xonadonlaridan birida yong‘in sodir bo‘layotganligi to‘g‘risida shahar FVBga xabar kelib tushgan.
Yong‘in-qutqaruvchilar soat 14:50 da voqea joyiga yetib borib, yong‘in soat 14:59 da o‘chirilgan. Yong‘inni bartaraf etishga 2 ta yong‘in-qutqaruv ekipaji va 1 ta avtonarvon jalb qilingan.
Hodisa oqibatida xonadonning 10 kvadrat metr maydonda uy jihozlari yonib zararlangan. Olib borilgan tezkor harakatlar tufayli yong‘indan uyning 200 kvadrat metr maydoni saqlab qolingan.
Yong‘indan tan jarohati olgan va halok bo‘lganlar yo‘q. Hozirda yong‘inning kelib chiqish sababi va keltirilgan moddiy zarar miqdori aniqlanmoqda.
