Rossiyaga qarshi sanksiyalarning yettinchi paketidan nimalar o‘rin olgan?
Cheklovlar chorshanba kuni qabul qilinishi kutilmoqda.
Yevroittifoqning Rossiyaga qarshi sanksiyalarning yettinchi paketi qaysi sohalar va shaxslarni qamrab olishi maʼlum bo‘ldi. Bu haqda Reuters xabar berdi.
Yangi cheklovlar ostida Rossiyadagi “Tungi bo‘rilar” motoklubi va uning rahbariyati tushgan. Xususan, ushbu jamiyat prezidenti Aleksandr Zaldastanov va uning uch o‘rinbosarlari “qora ro‘yxat”dan o‘rin olgan.
“Sberbank”ka qarshi sanksiyalar xam kuchaytirilgan. G‘arb davlatlarida uning barcha aktivlari butunlay muzlatiladi. Bundan tashqari, bank bu hududda moliyaviy operatsiyalarning katta qismini amalga oshira olmaydi. Bu faqatgina oziq-ovqat va qishloq xo‘jaligi mineral o‘g‘itlari sohasidagi amaliyotlarga nisbatan tatbiq etilmaydi.
Umumiy hisobda sanksiyalarning yangi paketiga RFning 8 nafar yuridik va 47 nafar jismoniy shaxslari o‘rin olgan. Ular orasida Moskva meri Sergey Sobyanin, aktyorlar Sergey Bezrukov va Vladimir Mashkov, “Rostex” korporatsiyasi rahbari Sergey Chemezovlar bor.
Reuters maʼlumotlariga ko‘ra, cheklovlar chorshanba kuni tasdiqlanadi.
Avvalroq Vengriya Rossiyaga qarshi sanksiya joriy etishni to‘xtatishga chaqirgandi.
