Davlat rahbarlari sammiti arafasida Markaziy Osiyo TIV rahbarlari uchrashdi

 

2022 yil 20 iyul kuni O‘zbekiston Respublikasi Tashqi ishlar vaziri v.b. Vladimir Norov Cho‘lponota shahrida Markaziy Osiyo davlatlari tashqi ishlar vazirlarining yig‘ilishida ishtirok etdi.

 

Tomonlar birinchi navbatda Markaziy Osiyo davlatlari rahbarlarining bo‘lajak Maslahat uchrashuviga tayyorgarlik masalasini ko‘rib chiqqan. Sammit kun tartibi va dasturi, davlat rahbarlari tomonidan ko‘rib chiqish uchun taqdim etiladigan yakuniy hujjatlar loyihalari bilan tanishilgan va maʼqullangan.

 

Markaziy Osiyoda siyosat, savdo, investitsiya, sanoat, transport, ekologiya, energetika, mintaqaviy xavfsizlikni taʼminlash, zamonaviy xavf-xatar va tahdidlarga birgalikda qarshi kurashish sohalarida davlatlararo hamkorlikning bugungi holati hamda istiqbollari yuzasidan fikr almashildi.

 

Vladimir Norov o‘z nutqida bugungi kunda Markaziy Osiyoda davlat rahbarlarining siyosiy irodasi tufayli prinsipial jihatdan yangi do‘stlik, hamkorlik va o‘zaro ishonch muhiti shakllanganini taʼkidladi.

 

Shu bilan birga, zamonaviy voqeliklarni hisobga olgan holda, Markaziy Osiyoda hamkorlikni mustahkamlash bo‘yicha qatʼiy qadamlar qo‘yish, yuzaga kelayotgan tahdidlarga o‘z vaqtida javob berish va oqibatlarini yumshatish bo‘yicha tegishli tashabbus hamda yangi yondashuvlarni ishlab chiqish zarurligi qayd etildi.

 

Xususan, yaqin savdo-iqtisodiy va investitsiyaviy siyosat yuritish, tadbirkorlik subyektlari va hududlar o‘rtasida to‘g‘ridan-to‘g‘ri aloqalarni yo‘lga qo‘yish, mintaqaning transport-tranzit salohiyatini rivojlantirish, tabiiy resurslarni birgalikda samarali boshqarish muhimligi taʼkidlandi. Taʼkidlanganidek, bu yo‘nalishlarda qo‘shma chora-tadbirlarning muvaffaqiyatli amalga oshirilishi butun Markaziy Osiyo makonining barqaror rivojlanishi uchun har tomonlama samara beradi.

 

Afg‘onistondagi mavjud vaziyatga alohida eʼtibor qaratildi. Afg‘on xalqiga gumanitar yordam ko‘rsatishda hamkorlikni davom ettirish dolzarbligi taʼkidlandi.