Suriya Kiyev bilan diplomatik munosabatlarni to‘xtatdi
Bunga Damashqning “DXR” va “LXR”ning “mustaqilligi”ni tan olishi sabab bo‘lgan.
Suriya Ukraina bilan diplomatik aloqalarni uzadi. Bu haqda SANA axborot agentligi xabar berdi.
Agentlikning Suriya TIVga tayanib bergan maʼlumotiga ko‘ra, bu Kiyevning harakatlariga javob tarzida amalga oshirilmoqda. 29 iyun kuni Damashq Ukraina sharqidagi “DXR” va “LXR”ning “mustaqilligi”ni tan olgandi. Bunga javoban Vladimir Zelenskiy Suriyaga qarshi sanksiyalarning kuchaytirilishini maʼlum qildi. Bundan tashqari, Kiyev diplomatik aloqalar uzilishini taʼkidlagan.
Shu bilan birga ikki davlat o‘rtasida konsullik munosabatlari saqlanib qolgan.
Avvalroq Ukraina KXDR bilan ham diplomatik aloqalarni uzgandi.
