Jizzaxda Hyundai avtomobili butunlay yonib ketdi
Oqibatda transport vositasiga 586 mlnlik zarar yetgan.
Bugun, 21-iyul kuni Jizzax viloyatining Paxtakor tumanida yengil avtomobil yonib ketdi. Holat yuzasidan viloyat Favqulodda vaziyatlar boshqarmasi axborot xizmati ma’lumot berdi.
Qayd etilishicha, soat 16:14 da Paxtakor tumani hududida avtomashina yonayotganligi to‘g‘risida viloyat FVBga xabar kelib tushgan. Darhol hodisa joyiga qutqaruvchilar bo‘linmasi yuborilgan. Qutqaruvchilar voqea joyiga soat 16:30 da yetib borishgan va yong‘in 16:40 da bartaraf etilgan.
1979-yilda tug‘ilgan fuqaro J. E. boshqaruvida bo‘lgan “HYUNDAI SANTA FE” Paxtakor tumani “Chamanzor” MFY hududidan o‘tuvchi UR-38 avtomobil yo‘lining 1-kilometrida Paxtakor–Jizzax yo‘nalishida harakatlanib ketayotgan vaqtida transport vositasining motor qismida yong‘in chiqqan. Haydovchining yong‘inni mustaqil o‘chirishga bo‘lgan harakatlari foyda bermagan. Yong‘in haqida guvohlardan biri “101” qisqa raqami orqali xabar qilgan.
Hodisa oqibatida avtomashina to‘liq yonib, yaroqsiz holatga kelib qolgan. Jabrlanganlar yo‘q. Ko‘rilgan moddiy zarar miqdori taxminan 586 million so‘mni tashkil etmoqda.
