O‘zbekistonda dizayn va moda xalqaro universiteti ochiladi
Bu bo‘yicha Prezident qarori loyihasi e’lon qilindi.
O’zbekistonda 2022/2023-o‘quv yilidan boshlab Toshkent dizayn va moda xalqaro universiteti ochiladi. Bu bo’yicha Prezident qarori normativ-huquqiy hujjatlar loyihalari muhokamasi portalida e’lon qilindi.
Qarorga ko’ra, Toshkent to‘qimachilik va yengil sanoat institutining “Yengil sanoat buyumlari konstruksiyasini ishlash va texnologiyasi (tikuv buyumlari texnologiyasi)”, “Dizayn” yo‘nalishidagi bakalavriat ta’lim yo‘nalishlari va magistratura mutaxassisliklari hamda Parij xalqaro moda universiteti bilan qo‘shma fakultet negizida Toshkent dizayn va moda xalqaro universiteti (keyingi o‘rinlarda – Universitet) tashkil etiladi.
Yangi oliygoh respublikada dizayn, to‘qimachilik, axborot texnologiyalari, tarmoqlar iqtisodiyoti, marketing va boshqa talab yuqori bo‘lgan ta’lim yo‘nalishlari bo‘yicha yuqori malakali mutaxassis sifatida asosan xotin-qizlarni tayyorlash hamda ta’lim sifatini yaxshilash, shuningdek, zamonaviy kadrlarni tayyorlash, qayta tayyorlash va malakasini oshirish tizimini takomillashtirish, sohaga doir ilg‘or xorijiy tajribalarni joriy etish va ta’lim jarayonini ishlab chiqarish bilan integratsiyasini jadallashtirish maqsadida ochilmoqda.
Universitetda ta’lim jarayonlari Parij xalqaro moda universiteti (Fransiya), Markaziy Lankshir universiteti (Buyuk Britaniya), Koreya politexnika universiteti (Janubiy Koreya), Yevropa dizayn instituti (Italiya) va boshqa nufuzli xorijiy oliy ta’lim muassasalari bilan xalqaro standartlar asosida olib boriladi.
