Istanbulda imzolangan kelishuv Ukrainaga nimalar beradi?
Eksportga mo‘ljallangan 20 million tonnadan ortiq don Rossiya tomonidan to‘sib qo‘yilgan edi.
Ukraina prezidenti devonining vakili Andrey Sibiga don yo‘lagi bo‘yicha imzolangan hujjatni e’lon qildi.
“Bugun biz bu yo‘nalishda juda muhim qadam tashlamoqdamiz. Istanbulda g‘alla va boshqa mahsulotlarni xavfsiz tashish uchun gumanitar koridor yaratish tashabbusi imzolandi. Ukraina portlari – Odessa, Chornomorsk va Yujniy orqali”, — deb yozadi Sibiga.
Prezident devoni vakili ushbu tashabbus uzoq vaqt davomida asosiy ittifoqchilar bilan tayyorlanib, muhokama qilingani va ular tomonidan qo‘llab-quvvatlanganini alohida ta’kidlagan.
“Ukraina tomonidan g‘alla eksportining blokirovkasini olib tashlash, birinchi navbatda, Ukraina agrar sektorining keyingi faoliyatining kafolatidir. Rossiyaning Ukrainaga hujumi natijasida eksportga mo‘ljallangan 20 million tonnadan ortiq don to‘sib qo‘yildi”, — deyiladi hujjat e’lon qilingan xabarda.
