Toshkentda qurilishi bitmagan oshxona yonib ketdi
FVV hodisa tafsilotlarini ma’lum qildi.
Bugun, 22-iyul kuni Toshkent shahrining Chilonzor tumanidagi oshxonalardan birida yong‘in yuz berdi. Bu haqda Favqulodda vaziyatlar vazirligi matbuot xizmati xabar berdi.
Ma’lum qilinishicha, soat 18:21 da Chilonzor tumani “Yakkatut” MFY Al-Xorazmiy ko‘chasida joylashgan qurilishi yakunlanmagan oshxonada yong‘in yuzaga kelganligi bo‘yicha Toshkent shahar FVBga xabar kelib tushgan.
Shunga ko‘ra, 5 ta yong‘in-qutqaruv ekipaji soat 18:26 da voqea joyiga yetib borib, yong‘in soat 18:42 da qurshab olingan va soat 18:49 da bartaraf etilgan.
Yong‘in oqibatida binoning 200 kvadrat metr maydonda ichki va tom qismi yonib zararlangan. Olib borilgan tezkor harakatlar natijasida binoning 600 kvadrat metr maydoni yong‘indan saqlab qolingan.
Hodisa oqibatida tan jarohati olish va halok bo‘lish xolatlari qayd etilmagan. Hozirda yong‘inning kelib chiqish sababi va keltirilgan moddiy zarar miqdori aniqlanmoqda.
