Erdo‘g‘on Moskva va Kiyevni yarshatirish harakatida
“Turkiya tinchlik o‘rnatilmaguncha diplomatik sa’y-harakatlarini davom ettiradi”, — degan Prezident.
Turkiya Prezidenti Rajab Toyyib Erdo‘g‘on Anqara Rossiya va Ukraina o‘rtasida tinchlik o‘rnatilgunga qadar diplomatik sa’y-harakatlarini davom ettirishini aytdi. Bu haqda Turkiyaning Anadolu agentligi xabar bermoqda.
Shuningdek, Turkiya Ukrainadan Qora dengiz orqali g‘alla eksporti bo‘yicha kelishuv doirasida Ukraina portlarini minalardan tozalashda Kiyevga yordam berishi mumkinligi xabar qilindi.
“Agar kerak bo‘lsa, minalardan tozalash uchinchi davlat tomonidan amalga oshirilishi mumkin. Turkiya yordam berishga tayyor”, — deyiladi bayonotda.
Eslatib o‘tamiz, juma kuni ertalab Istanbulda g‘alla eksporti uchun yo‘lak yaratish bo‘yicha ikkita hujjat imzolangan edi.
O‘tgan hafta Ukraina g‘allasini eksport qilish bo‘yicha muzokaralarda Rossiya, Turkiya, BMT va Ukraina Istanbulda muvofiqlashtiruvchi markaz tashkil etishga kelishib, portlardagi donni birgalikda nazorat qilish bo‘yicha kelishuvga erishgan edi.
