AQSH Ukraina donini olib chiqishning muqobil yo‘llarini qidirishda davom etmoqda
Amerika tomoni Moskvaning vaʼdalariga ishonmayapti.
Vashington Ukraina g‘allasini olib chiqish bo‘yicha “B reja”ni ishlab chiqmoqda. Bu haqda AQSH xalqaro taraqqiyot agentligi (USAID) rahbari Samanta Pauer maʼlum qildi.
Uning so‘zlariga ko‘ra, Qo‘shma Shtatlar Moskvaning Istanbul kelishuvlarida olgan majburiyatlarini bajarishiga ishonmayapti. Diplomat “B reja” o‘z ichiga g‘allani avtomobil va temiryo‘l tarmoqlari, shuningdek, daryo barjalari orqali olib chiqishni nazarda tutishini ochiqlagan.
Maʼlumot o‘rnida: 22 iyul kuni Istanbulda Ukraina donini Qora dengiz portlari orqali eksport qilishni nazarda tutuvchi to‘rt tomonlama (Rossiya, Ukraina, Turkiya va BMT) shartnoma imzolandi. Unga ko‘ra, Moskva g‘allaning jahon bozoriga dengiz marshrutlari orqali olib chiqilishiga to‘sqinlik qilmaslik majburiyatini oldi.
Ammo shartnoma imzolanganidan bir kun o‘tib Rossiya Odessa portiga raketa zarbalarini berdi. Moskva Ukraina harbiy kemasiga qarata o‘t ochilganini taʼkidlagan.
