Toshkentda mushuk jasadlari ariqqa tashlab ketilgani aytildi
Shuningdek, Nukusda it va mushuklarning o‘ligi noqonuniy ravishda ko‘milgani aniqlandi.
Kecha, 25-iyul kuni ijtimoiy tarmoqda Toshkent shahri Yangihayot tumanida ariqqa mushuk o‘liklari tashlanganligi bo‘yicha material e’lon qilingandi. Holat yuzasidan tuman hokimligi rasmiy munosabat bildirdi.
Ma’lum qilinishicha, aslida u qoldiqlar qo‘ylarning qoldiqlari bo‘lib, mahalla fuqarolari tomonidan so‘yilib, ariqqa oqizib yuborilgan.
Mazkur holatdan xabar topilgach, tuman obodonlashtirish bo‘limi xodimlari tomonidan ariq tozalanib, fuqarolarga bunday holatni takrorlamaslik bo‘yicha tushuntirish ishlari olib borilgan.
“Bunday holatlarning kelib chiqishi ekologiya va inson salomatligiga zarar ekanligini inobatga olib, fuqarolarimizdan atrof-muhit tozaligiga bee’tibor bo‘lmasliklarini so‘rab qolamiz”, — deyiladi xabarda.
Shuningdek, joriy yilning 20-iyul kuni “Daryo” internet nashrida Qoraqalpog‘iston Respublikasi Nukus shahri yaqinidagi poligonda 100 dan ortiq it va mushuklarning jasadi topilgani xabar qilingandi.
Mazkur holat Qoraqalpog‘iston Respublikasi Ekologiya va atrof-muhitni muhofaza qilish qo‘mitasining inspektorlari tomonidan joyiga chiqib o‘rganilgan va Nukus shahri yaqinida joylashgan maishiy chiqindilar poligonida hech qanday it va mushuklarning jasadi yo‘qligi ma’lum bo‘lgan.
Ta’kidlanishicha, it va mushuklarning jasadlari Nukus shahar obodonlashtirish boshqarmasi mas’ul shaxslari tomonidan A-380 “Nukus–To‘rtko‘l” avtomagistral yo‘lining o‘ng tomonida, aholi yashash punktidan taxminan 12-15 km. uzoqlikdagi belgilanmagan joyga noqonuniy ravishda ko‘mib tashlanganligi aniqlangan.
“Ushbu holat bo‘yicha qonunga xilof ravishda ish tutgan mas’ul shaxslardan tushuntirish xatlari olindi, zarur hujjatlar rasmiylashtirilib, Qoraqalpog‘iston Respublikasi prokuraturasiga taqdim etildi”, — deyiladi xabarda.
