Bayden Si Szinpin bilan nimalarni muhokama qilishi ochiqlandi
Oq uy bu bo‘yicha maʼlumot berdi.
Si Szinpin va Jozef Bayden telefon muloqotida nimalarni muhokama qilishi ochiqlandi. Bu haqda Oq uyning milliy xavfsizlik masalalari bo‘yicha rasmiy vakili Jon-Kirbi maʼlum qildi.
Uning so‘zlariga ko‘ra, davlat rahbarlari Ukraina, Hind-Tinch okeani va Tayvandagi vaziyat bo‘yicha suhbatlashadi. Shu bilan Bayden ikki tomonlama munosabatlardagi keskinlikka eʼtibor qaratmoqchi. Ayrim maʼlumotlarga ko‘ra, telefon muloqoti 28 iyulda o‘tkazilishi mumkin.
Xitoy-AQSH o‘rtasidagi aloqalar so‘nggi vaqtlarda yangi keskinlikka qarab ketmoqda. Bunga Kongressning vakillar palatasi spikeri Nensi Pelosining Tayvanga ehtimoliy tashrifi sabab bo‘lgan. Bunga javoban Xitoy mamlakat ichki ishlariga tashqi aralashuvning har qanday ko‘rinishiga qarshi chiqishini va buning uchun zarur bo‘lsa armiyani jalb qilishini taʼkidlagan. Bundan oldin Bayden ham XXRning Tayvanga bostirib kirgan taqdirida Vashingtonning harbiy aralashuvini inkor qilmagandi.
