X. Sulaymonova nomidagi sud ekspertiza markazi faoliyati noqonuniymi?
Deputat markazning oʻz vakolatidan chetga chiqib, ish yuritayotganini aytmoqda.
Adliya vazirligiga qarashli X. Sulaymonova nomidagi sud ekspertiza markazi vakolatidan chetga chiqib, baholash faoliyati bilan shugʻullanib kelayotgani aytilmoqda. Bu haqda Oliy Majlis Qonunchilik palatasi deputati Rasul Kusherbayev telegram kanalida xabar qilindi.
Deputatning yozishicha, sud ekspertiza markazining baholash faoliyatini amalga oshirishi qonun bilan taqiqlangan. Konstitutsiya, qonun yoki Oliy Majlis palatalarining qarorida ushbu markazga baholashni amalga oshirish huquqi berilmagan.
Shunga qaramay, ayrim fuqarolik ishlari boʻyicha sudlar, hokimlik va boshqa idoralar tomonidan fuqarolarning koʻchmas mulklarini Adliya vazirligi huzuridagi X.Sulaymonova nomidagi sud ekspertiza markazi baholashi boʻyicha qarorlar qabul qilmoqda. Bu esa fuqarolarda norozilik tugʻdiryapti.
“Eng qizigʻi, baholash vakolati yoʻq ekanligini biladigan ushbu markaz ham uni rad etish oʻrniga vakolatidan chetga chiqib, baholash faoliyati bilan shugʻullanib kelmoqda”, — deydi deputat.
“Baholash faoliyati toʻgʻrisida”gi qonunning 4-1-moddasiga koʻra, baholovchi tashkilot baholash faoliyatini amalga oshirish huquqini beruvchi litsenziyaga ega boʻlgan yuridik shaxs hisoblanadi.
Agar qonun hujjatlarida boshqacha qoida belgilanmagan boʻlsa, davlat hokimiyati va boshqaruvi organlarining baholovchi tashkilotni tashkil etishi, shuningdek baholash faoliyatini amalga oshirishi taqiqlanadi.
