Uchta viloyatda o’qishga kirituvchi firibgarlar aniqlandi
Tezkor tadbirlar davomida 6000 ming AQSH dollari va 22 mlnlik korrupsion holat fosh bo‘lgan.
O‘qishga kiritib qo‘yish bilan bog‘liq firibgarlik holatlari fosh etildi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, Departament hamda DXXning Namangan viloyati boshqarmalari tomonidan o‘tkazilgan tezkor tadbirda fuqaro O.E. fuqaro A.ning tanishini Namangan davlat universitetining jismoniy madaniyat fakultetiga o‘qishga kiritib qo‘yish evaziga 4 000 AQSH dollari va 22 mln so‘mni olgan vaqtida ashyoviy dalillar bilan ushlangan.
Departamentning Samarqand shahar bo‘limi tomonidan o‘tkazilgan tezkor tadbirda fuqaro X. N. boshqa bir fuqaro J.ni Samarqand davlat univeritetiga o‘qishga kiritib qo‘yish evaziga 2000 AQSH dollarini olgan vaqtida qo‘lga tushgan.
Shuningdek, IIB xodimlari bilan hamkorlikda Kogon shahrida o‘tkazilgan tezkor tadbirda fuqaro N. E. fuqaro M.ni 1500 AQSH dollari evaziga tanishlari orqali Buxoro shahridagi Jamoat salomatligi texnikumiga o‘qishga kiritib qo‘yishni va’da qilib, oldindan 400 AQSH dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
