Namanganda bog‘cha bolasi tilini chaynab yuborib, vafot etdi
Holat yuzasidan vazirlik ma’lumot berdi.
Kecha, 1-avgust kuni Namangan viloyatining Chust tumanidagi 64-sonli davlat maktabgacha ta’lim tashkilotida 5 yoshli bola tilini chaynab yuborib, vafot etdi. Holat yuzasidan vazirlik mа’lumot berdi.
Dastlabki o‘rganish natijalariga ko‘ra, 2017-yilda tug‘ilgan A. Sh. 1-avgust kuni ertalab MTTga qabul qilingan. Ta’limiy faoliyatga yaxshi qatnashgan. Kun tartibiga muvofiq tushlik qilgan va gigiyena qoidalariga amal qilgach barcha tarbiyalanuvchilar qatori uxlashga yotgan.
Tarbiyachi uyqudan uyg‘onish vaqti bo‘lganda avval qiz bolalarni, so‘ngra o‘g‘il bolalarni hojatga olib chiqish uchun uyqudan uyg‘otgan. Lekin bola boshini ko‘targan va yana yotib olgan. Qizlarni hojatdan olib kelib A.Sh.ni uyg‘otgan. Shunda bola tilini chaynab yuborganligini ko‘rgan va zudlik bilan hamshirani oldiga birinchi yordam ko‘rsatish uchun ko‘tarib olib chiqqan.
MTT hamshirasi bolaga birinchi tibbiy yordamni qilib zaruriy muolajalarni amalga oshirgan va tez tibbiy yordamga xabar berilgan.
Tibbiyot xodimlarining harakatlariga qaramay bola vafot etgan. O‘lim haqidagi ma’lumotnomaga asosan, J22 Quyi nafas yo‘llarining aniqlanmagan o‘tkir respirator infeksiyasi; J81 O‘pka shishishi o‘lim sababi etib ko‘rsatilgan.
Ushbu holat yuzasidan 2 avgust kuni viloyat Maktabgacha ta’lim boshqarmasi tezkor guruhi tomonidan dastlabki o‘rganish o‘tkazilgan hamda tegishli ma’lumotlar va hujjatlar to‘plangan. Hozirda holat yuzasidan tergov ishlari amalga oshirilmoqda.
