Shavkat Mirziyoyev YXHT komissarini qabul qildi

 

Bugun, 2 avgust kuni Prezident Shavkat Mirziyoyev O‘zbekistonda tashrif bilan bo‘lib turgan Yevropada xavfsizlik va hamkorlik tashkilotining (YXHT) Milliy ozchiliklar masalalari bo‘yicha Oliy komissari Qayrat Abdurahmonovni qabul qildi.  

 

Uchrashuvda amaliy hamkorlikni yo‘lga qo‘yish masalalari hamda millatlararo totuvlik va barqaror taraqqiyotni ta’minlash sohasida qo‘shma loyiha va dasturlarni amalga oshirish istiqbollari ko‘rib chiqildi.

YXHT institutlari bilan ustuvor yo‘nalishlarda – xavfsizlik, iqtisodiyot va ekologiya sohalarida, gumanitar yo‘nalishdagi konstruktiv muloqot va sermahsul hamkorlikning bugungi darajasi mamnuniyat bilan qayd etildi. O‘rta muddatli istiqbolda qariyb 50 ta tadbirni o‘tkazish nazarda tutilgan “yo‘l xaritasi” birgalikda amalga oshirilmoqda.

 

Oliy komissar O‘zbekistonda bag‘rikenglik va gumanizm madaniyatini rivojlantirish, millatlararo va fuqarolararo anglashuv va totuvlikni ta’minlash, shu asosda yosh avlodni tarbiyalash bo‘yicha olib borilayotgan siyosatga yuksak baho berdi.

 

O‘zbekistonning Markaziy Osiyo mintaqasida do‘stlik, yaxshi qo‘shnichilik va ko‘p qirrali sheriklik munosabatlarini mustahkamlash, Afg‘onistonning tinch rivojlanishi va iqtisodiy tiklanishiga ko‘maklashish borasidagi tashabbuslari qo‘llab-quvvatlandi.

 

Qator qo‘shma tadbirlar – milliatlararo totuvlik masalalari bo‘yicha mintaqaviy seminar, xalqaro tajriba va YXHT tavsiyalarining taqdimotini o‘tkazish, shuningdek, O‘zbekiston delegasiyasining millatlararo munosabatlar muammosiga  bag‘ishlangan davra suhbatida ishtirok etishi yuzasidan kelishuvlarga erishildi.

 

Ko‘p tilli ta’lim sohasida, shu jumladan Markaziy Osiyo ta’lim dasturi doirasida loyihalarni amalga oshirish ham ko‘zda tutilgan.