Toshkentda Matiz haydovchisi ikki piyodani urib yubordi
Oqibatda 5 yoshli bola shifoxonada vafot etgan.
Toshkent shahrining Olmazor tumanida 30 iyul kuni Matiz haydovchisi yo‘lni kesib o‘tayotgan 2 nafar piyodani urib yubordi. Holat yuzasidan shahar IIBB YHXB axborot xizmati ma’lumot berdi.
Qayd etilishicha, o‘sha kuni soat 15:30 larda 2001 yilda tug‘ilgan haydovchi A. Sh. o‘zining boshqaruvidagi Matiz (davlat raqami 70 L 839 FA) rusumli avtoulovda Olmazor tumani Farobiy ko‘chasi bo‘ylab harakatlanayotganda yo‘lning qarama-qarshi qismiga chiqib ketgan. Shundan so‘ng 14-sonli oilaviy poliklinika qarshisida yo‘lni kesib o‘tayotgan 1988 yilda tug‘ilgan piyoda T. N. va voyaga yetmagan 2017 yilda tug‘ilgan X. M.ni urib yuborgan.
YTH oqibatida piyoda T. N. va X. M.lar Respublika shoshilinch tez tibbiy yordam ilmiy markazi shifoxonasiga yotqazilgan, biroq shifokorlarning urinishlariga qaramay, voyaga yetmagan X. M. shifoxonada vafot etgan.
Mazkur holat yuzasidan Toshkent shahar IIBB Tergov boshqarmasi tomonidan O‘zbekiston Respublikasi Jinoyat kodeksining 266-moddasi 2-qismi bilan jinoyat ishi qo‘zg‘atilgan. A. Sh.ga nisbatan qamoqqa olish ehtiyot chorasi tanlangan. Tergov harakatlari davom etmoqda.
