Sog‘liqni saqlash vaziri Antikorrupsiya agentligi rahbariga kelishib olishni taklif qildi

 

Bugun, 4-avgust kuni Oliy Majlis Senatining yalpi majlisi bo‘lib o‘tdi. Unda Sog‘liqni saqlash vaziri B. Musayev ham ishtirok etib, ijtimoiy tarmoqlarda muhokamalarga sabab bo‘layotgan sog‘liqni saqlash tizimidagi moliyaviy xato-kamchiliklar haqidagi ma’lumotlar yuzasidan Korrupsiyaga qarshi kurashish agentligi direktori A. Burhonovga o‘z e’tirozlarini bildirdi.

 

“Tizimda juda ko‘plab kamchiliklarga e’tibor berilgan. Lekin juda katta bir raqamlar qo‘yilib ketmoqda. Nima uchun 34-varaqdagi hisobotda sog‘liqni saqlash tizimida 50 milliard moliyaviy xato-kamchiliklar deyilyapti? 45-varag‘ida 56 milliard?

Shunday bir kayfiyat borki, bu katta raqamni ortidan quvishdek. Bir narsaga kelishib olishimiz kerak-da. Moliyaviy nazorat organidan olingan ma’lumotlar asosida tayyorlangan hisobot… Moliyaviy nazorat organi aniqladi, bu korrupsiyaviy holat bo‘ldimi yoki yo‘qmi? Buni hali sud isbotladimi yoki yo‘qmi?

395 ta davolash profilaktika muassasalarida… Bizning tibbiyot tizimida 500 mingdan ortiq xodim ishlaydi. Hozir tibbiyot sohasi eng korrupsion soha degan xulosa qilinyapti. Qani, shu 395 ta tashkilot. Biz ko‘rganimizdan beri shu ma’lumotlarning tagiga yetgimiz kelyapti”, — degan vazir. 

 

Xususan, vazir bu hisobot moliyaviy nazorat organlarining ma’lumotlari asosida tayyorlanganini ta’kidlab, “agar tizimda shunday korrupsion holatlar bo‘lgan bo‘lsa, nega birorta kattaroq tibbiyot tizimining rahbari yoki boshqa mansabdorga nisbatan sud tomonidan qat’iy chora ko‘rilmadi?”, degan savolni o‘rtaga tashlagan. 

 

Senat raisi Tanzila Norboyeva bu ma’lumotlarning asosi bo‘lmasa, Senatga olib chiqilmasligini, bu kabi masalalarda agentlik direktori bilan vazirlikda muhokama qilinishini ta’kidlagan.

 

“Bu yer adi-badi aytib o‘tiradigan auditoriya emas-da. Bizga bu yerda milliy ma’ruzani taqdim qilishi kerak, biz uni eshitib, o‘zimizning topshiriqlarni agentlikka berishimiz kerak. Hozir agar siz chiqib buni gapiradigan bo‘lsangiz, Xalq ta’limi vazirligi yoki boshqa vazirliklar chiqib gapiradigan bo‘lsa, bu boshqacha maydonga aylanib ketadi”, – degan Norboyeva.

 

Korrupsiyaga qarshi kurashish agentligi direktori Akmal Burhonov bu ma’ruza boshqa idoralar bilan ham hamkorlikda qilinganini ta’kidlab, unga jamoatchilikda shubha bo‘lmasligini so‘ragan.

 

“Bu milliy ma’ruza faqat agentlik tomonidan ishlab chiqilgan emas, balki korrupsiyaga qarshi kurashuvchi idoralar bilan birgalikda tayyorlangan. Hozir bu yerda jamoatchilik ham ko‘ryapti, bu milliy ma’ruzaga shubha bo‘lmasligini so‘rardim. Bu milliy ma’ruzani biz mart oyida tayyor qilganmiz va vazirlik-idoralarga yuborganmiz”, — degan u.