Toshkentda daraxtga shikast yetkazilgani bo‘yicha jinoyat ishi ochildi
Bosh prokuratura tekshiruv natijalarini ma’lum qildi.
Avvalroq Toshkent shahrining Chilonzor ko‘chasini rekonstruksiya qilish jarayonida daraxtlarga zarar yetkazilgani xabar qilingandi. Mazkur holat Bosh prokuratura tomonidan o‘rganilib, tekshiruv natijalari e’lon qilindi.
Qayd etilishicha, mutaxassislar tomonidan Chilonzor shohko‘chasidagi qurilish hududida mavjud bo‘lgan 108 ta daraxt ahvoli o‘rganilgan. O‘rganishda 7 dona “Eman” daraxtining tomir qismi ochilishi oqibatida shikast yetkazilgani hamda daraxtlar xavf ostida qolgani aniqlangan.
Ushbu holatda zudlik bilan choralar ko‘rilmagan taqdirda shikast yetkazilgan daraxtlar qurishi oqibatida tabiat va atrof muhitga 348,9 mln so‘m zarar yetkazilishiga olib kelishi mumkinligi ko‘rsatilgan.
Mazkur holat yuzasidan Jinoyat kodeksining 198-moddasi 3-qismi (Ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) bilan jinoyat ishi qo‘zg‘atilib, tergov harakatlari olib borilmoqda.
