Andijonda “perevod” uchun pora olgan shaxs ushlandi
U ikkita talabaning o‘qishini Toshkentga ko‘chirib bermoqchi bo‘lgan.
Izboskan tumanida fuqarolarning o‘qishini ko‘chirib berishni va’da qilgan firibgar ushlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Ma’lum qilinishicha, Departament hamda DXXning Izboskan tumani bo‘limlari tomonidan tezkor tadbir o‘tkazilgan. Unda fuqaro G. E. boshqa fuqarolar M. va T.ning qo‘shni Qirg‘iziston Respublikasi Oliy ta’lim muassasasidagi o‘qishlarini tanishlari yordamida Toshkent menejment va iqtisodiyot professional profil institutiga ko‘chirib berishni 3600 AQSH dollariga kelishib, oldindan 900 AQSH dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
