Chilonzorda 100 dan ortiq daraxt shikastlangani ma’lum bo‘ldi

 

 

Avvalroq Toshkent shahrining Chilonzor ko‘chasini rekonstuksiya qilish jarayonida daraxtlarga shikast yetkazilgani va bu bo‘yicha Bosh prokuratura tomonidan jinoyat ishi qo‘zg‘atilgani xabar qilingandi. 

 

Davlat ekologiya qo‘mitasi ham dastlabki o‘rganish ishlari va uning natijalari bo‘yicha rasmiy bayonot e’lon qildi.

 

Aniqlanishicha, Chilonzor ko‘chasi yo‘lini rekonstruksiya qilish jarayonida umumiy rejalashtirilgan 1,4 km yo‘l ta’mirlash loyihasining 300 metr qismida eski irrigasiya tarmoqlar (lotoklar) olib tashlanib, yo‘lni kengaytirish va sathini 1 metrgacha pasaytirish ishlari amalga oshirilgan.

Mazkur qurilish-ta’mirlash ishlari jarayonida Chilonzor ko‘chasidagi mavjud jami 101 tup daraxtlarga, shu jumladan, 92 tup eman, 1 tup chinor, 5 tup tut, 2 tup archa va 1 tup mevali behi daraxtlarining ildiz qismini shikastlanganligi aniqlangan. 

 

Diametri 45–98 santimetrgacha bo‘lgan 7 tup eman daraxtlarining ildiz qismiga jiddiy shikast yetkazilganligi ma’lum bo‘lgan bo‘lsa, qo‘shimcha o‘rganish natijasida yana 2 tup eman, jami 9 tup eman daraxtlarining ildiz qismiga jiddiy shikast yetkazilganligi ma’lum bo‘lgan. Mutaxassislar fikriga ko‘ra, ushbu daraxtlarni saqlab qolish ehtimoli xavf ostida. 

 

Shuningdek, Chilonzor ko‘chasidagi qurilish-ta’mirlash ishlari natijasida qolgan 90 dan ortiq daraxtlar o‘sishdan to‘xtamaydigan darajada shikastlangani aniqlangan.

 

Toshkent shahar, Chilonzor ko‘chasini rekonstruksiya qilish jarayonida daraxtlarni ildiz tizimiga shikast yetkazilishi holatlari bilan, O‘zbekiston Respublikasining “O‘simlik dunyosini muhofaza qilish va undan foydalanish to‘g‘risida”gi Qonunining 32, 37-moddalari talablari buzilishiga olib kelgan.

 

Yuqoridagi holatlardan kelib chiqib, daraxtlarni ildiz tizimi jiddiy shikastlantirilganligi natijasida o‘simlik dunyosiga 420 mln 450 ming so‘m miqdorida zarar yetkazilganligi hisob-kitob qilingan.

 

Amaldagi qonunchilik talablariga ko‘ra, qurilish loyihalarni amalga oshirishdan oldin ekologik me’yoriy loyiha hujjatlari ishlab chiqilishi hamda majburiy tartibda Davlat ekologik ekspertizasidan o‘tkazilishi belgilangan. Aniqlanishicha, mazkur yo‘l qurilish-ta’mirlash ob’yekti bo‘yicha qonunchilikda belgilangan tartibda Davlat ekologik ekspertiza xulosasi olinmagan.