Toshkent viloyatida 100 ming dollarlik jinoyat fosh bo‘ldi
Holat bo‘yicha Bosh prokuratura ma’lumot berdi.
Toshkent viloyatining Yangiyo‘l tumanida noqonuniy yer sotilishi bilan bog‘liq jinoyat fosh bo‘ldi. Bu haqda Bosh prokuratura matbuot xizmati xabar berdi.
Ma’lum qilinishicha, Toshkent viloyat prokuraturasi tomonidan huquqni muhofaza qiluvchi organ hodimlari bilan hamkorlikda tezkor tadbir o‘tkazilgan.
Tadbir davomida A.B. Toshkent viloyati Yangiyo‘l tumanidagi U.Yusupov massividan tuman hokimining 07.08.2019 yildagi qarori bilan “XALQOBOD DILOROM AGRO” fermer xo‘jaligiga 49 yil muddatga ijara asosida ajratilgan jami 36,8 ga sug‘oriladigan yer maydonini noqonuniy ravishda M. F.ga 100 ming AQSH dollariga sotishga kelishib, kelishilgan pullardan 25 ming AQSH dollarini murojaatchidan olayotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 229-6-moddasi (Sug‘oriladigan yer uchastkasiga bo‘lgan huquqni sotish yoxud qonunga xilof ravishda boshqacha tarzda o‘zga shaxsga berish) bilan jinoyat ishi qo‘zg‘atilgan. Hozirda tergov harakatlari olib borilmoqda.
