Samarqandda ikkita Damas o‘zaro to‘qnashib ketdi
Oqibatda bir nafar yo‘lovchi vafot etgan.
Joriy yilning 3-avgust kuni Samarqand viloyatining Toyloq tumanida 2 ta Damas ishtirokida yo‘l-transport hodisasi sodir bo‘ldi. Bu haqda viloyat IIB axborot xizmati xabar qildi.
Ma’lum bo‘lishicha, avtohalokat o‘sha kuni soat 20:00 atrofida Toyloq tumani hududidan o‘tuvchi A-377 avtomobil yo‘lining 9-kilometrida yuz bergan. Mazkur yo‘lda harakatlanib kelayotgan Damas haydovchisi avtomashina boshqaruvini yo‘qotib, qarama-qarshi yo‘nalishdagi Damasning old tarafiga borib urilgan.
Hodisa oqibatida ikkala haydovchi va bir nafar yo‘lovchi tuman tibbiyot birlashmasiga murojaat qilgan. Ko‘rsatilgan muolajalarga qaramasdan, yo‘lovchi shifoxonada vafot etgan.
Eslatib o‘tamiz, bundan oldin Samarqand viloyatining Pastdarg‘om tumanida Laсetti va Vaz-21063 rusumli avtomashinalar to‘qnashuvi oqibatida bir nafar yo‘lovchi voqea joyida halok bo‘lgandi.
Javohirbek TURSUNOV
