Toshkentdagi 5 qavatli binoda yong‘in chiqdi
Holat bo‘yicha FVV ma’lumot berdi.
Bugun, 10-avgust kuni Toshkent shahrining Chilonzor tumanidagi qurilishi bitmagan ko‘p qavatli uyda yong‘in chiqdi. Holat yuzasidan Favqulodda vaziyatlar vazirligi Matbuot xizmati dastlabki ma’lumotlarni ochiqladi.
Qayd etilishicha, soat 19:37 da Chilonzor tumani Beshyog‘och ko‘chasidagi yangi qurilayotgan 5 qavatli binoning 4-qavatida yong‘in sodir bo‘lganligi haqida shahar FVBga xabar kelib tushgan.
Shunga ko‘ra, 6 ta yong‘in-qutqaruv ekipaji soat 19:42 da voqea joyiga yetib borib, yong‘in soat 20:30 da qurshab olingan va soat 20:39 da to‘liq bartaraf etilgan.
Hodisa oqibatida fuqarolarning tan jarohati olish va halok bo‘lish holatlari yo‘q. Hozirda yong‘inning kelib chiqish sababi va keltirilgan moddiy zarar miqdori aniqlanmoqda.
