Ekoqoʻmita raisi bir vaqtning oʻzida 6 ta mashinadan foydalanadimi?
Ijtimoiy tarmoqdagi xabarlarga rasmiy izoh berildi.
Ijtimoiy tarmoqda Ekologiya va atrof-muhitni muhofaza qilish davlat qoʻmitasi raisi bir vaqtning oʻzida 5-6 ta xizmat mashinasidan foydalanishi haqida maʼlumotlar tarqaldi. Mazkur xabarlar yuzasidan qoʻmita matbuot xizmati rasmiy munosabat bildirdi.
Qayd etilishicha, qoʻmita rahbariyati xizmat avtomashinalaridan qonunchilik hujjatlarida belgilangan tartib-qoidalarga asosan foydalanib kelmoqda. Qoʻmita raisiga 1 ta “Merсedes” avtotransport vositasi biriktirilgan. Shuningdek, zarur hollarda xizmat vazifasini oʻtash davomida olis va chekka hududlarga xizmat safari vaqtida yonilgʻi xarajatlarini tejash maqsadida texnik koʻmak mablagʻlari hisobidan xarid qilingan navbatchi elektromobil ishlatilishi mumkin.
Joriy yilning oʻtgan davrida Qoʻmitaning barcha hududiy boʻlinmalari, shu jumladan, Qoraqalpogʻiston Respublikasi, Buxoro va Navoiy viloyatlarining olis va chekka hududlarida joylashgan muhofaza etiladigan tabiiy hududlarning moddiy-texnik bazasini yaxshilash maqsadida 40 dan ortiq avtotransport vositalari (“Niva”, elektromobil, “Damas”) xorijiy hamkorlarning texnik koʻmak mablagʻlari hisobidan xarid qilingan. Taʼkidlanishicha, ushbu avtotransport vositalari xaridi uchun byudjet mablagʻlari umuman sarf qilinmagan.
“Davlat ekologiya qoʻmitasi shaxsning qadr-qimmati kamsitilishiga yoki uning obroʻsizlantirilishiga olib keladigan yolgʻon, asoslanmagan axborotni tarqatganlik uchun Oʻzbekiston Respublikasi qonunchiligida tegishli javobgarlik normalari belgilanganligini eslatib oʻtamiz”, — deyiladi xabarda.
