Oʻzbekistonda ilk bor transplantologiya va kardioxirurgiya mutaxassislari tayyorlanadi

 

2022/2023-oʻquv yilidan Akademik V. Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi va Respublika  shoshilinch tibbiy yordam ilmiy markazida “Transplantologiya” va “Kardioxirurgiya” mutaxassisliklari boʻyicha klinik ordinatura (rezidentura) mutaxassisligi boʻyicha taʼlim olish yoʻlga qoʻyiladi. Bu haqda Sogʻliqni saqlash vazirligi Matbuot xizmati xabar berdi.

 

Muassasalarga Sogʻliqni saqlash vazirining tegishli buyrugʻi bilan mahalliy va xalqaro tajribaga asoslangan holda ushbu mutaxassisliklar boʻyicha oʻquv dasturlari tuzish boʻyicha topshiriqlar berilgan.

 

“Kardioxirurgiya” va “Transplantologiya” mutaxassisliklarining murakkabligini hisobga olgan holda, ularga faqatgina “Xirurgiya” buyicha magistratura yoki “Umumiy xirurgiya” klinik ordinatura (rezidentura)ni bitirgan mutaxassislar hujjat topshira oladi.

 

Nomzodlar umumiy tanlov asosida qabul qilinishi belgilangan boʻlib, bu yoʻnalishlarda amaliyotga yoʻnaltirilgan oʻquv jarayoni 3 yil davom etadi.

 

Maʼlumot uchun, joriy oʻquv yilidan boshlab maqsadli va toʻlov-kontrakt asosida oʻqishga kirgan klinik ordinatorlarning oʻquv jarayoni birinchi va ikkinchi (oʻqish muddati 3 yil boʻlgan mutaxassisliklar uchun) yillari tibbiyot institutlari klinikasi va ixtisoslashgan markazlarda oʻqitiladi. 

 

Oʻquv davrining bitiruv (ikkinchi, uchinchi) yilining ikkinchi semestrida (oʻquv muddatining oxirgi oʻquv semestrida) hududlardagi ixtisoslashgan tibbiyot markazlari filiallari, viloyat bolalar va kattalar koʻp tarmoqli tibbiyot markazlari, Respublika shoshilinch tez tibbiy yordam markazi filiallarida oʻquv amaliyot semestri oʻtkaziladi.